|
الحمـد للبـاري عزيـز الجلالـي حمد ٍ كثيـر ٍ عـد رمـل السْهَالـي |
|
الـواحـد المعـبـود أول وتـالـي فردٍ صمد مالـه شريـك ٍ يساويـه |
|
الباقـي اللـي دايــم ٍ مايـزولـي تحتار في وصفـه جميـع العقولـي |
|
منزه ٍ عـن كـل قـول ٍ جهولـي بالحمـد والتسبيـح يذكـر وندعيـه |
|
ياباني ٍ مـن فوقنـا سبـع ٍ شـداد ورفعتهن من دون عمـدان واوتـاد |
|
وزينتهـن بكواكـب ٍ مالـه اعـداد انت العظيم اللـي نخافـه ونرجيـه |
|
وبسطت أرضـك للخلايـق فضيّـة وذللتهـا يَمَـا غــدت كالمطـيّـة |
|
وارسيت أركانَـهْ بالجبـال القويّـة ودحيتها بالقوت والـرزق محصيـه |
|
وخلقـت آدمْ مـن تـرابٍ وطينـي واودعت نسلـه مـن مـاءٍ مهينـي |
|
لك الثنا والحمـد فـي كـل حينـي حمـدٍ بثـر حمـدٍ نعيـده ونثنيـه |
|
ومن بعد ذكري للولي عالي الشـان هو الكريم اللـي رحيـم ورحمـان |
|
سبحان من يعطي الجزيلات سبحان إلهـنـا حــق ٍ عليـنـا نبـديـه |
|
نذكر فعـول ٍ ماضيـات ٍ قديمـاتْ لجدودنا هـل الشـرف والمـرواتْ |
|
اللي لهم بالمجـد صولـة وجـولاتْ اعيـال الضّـوي جدنـا مانخفيـه |
|
سالم ولد شمروخ من نسل الاخيـارْ وزميل ابن زوبع له اخبار واذكـارْ |
|
وشمر لنا عزوة ليـا صارماصـارْ هـذا نسبنـا نفتخـر بـه ونبديـه |
|
وحنا ثلاث فخوذ ٍ عدِّنـا بالتمامـي السْميحْ والمِطلِبْ رجـال ٍ كرامـي |
|
وآل مْحَمُوداللـي بـراس السنامـي من ترثـة الاجـواد ماهـم دناويـه |
|
اعلومهـم عنـد النشامـى طريفـهْ اللـي فعايلهـم جــزالٍ شريـفـهْ |
|
اهل النقا واهـل العـراض العفيفـهْ تاريخهم معـروف ياجاهـل ٍ فيـه |
|
يشهد لهم بالطيـب هـو والشهامـهْ راعي سكاكا يـوم يشكـي سلامـهْ |
|
ويمـدح صيانيهـم كثيـر طعامـهْ هاكزمان اللي بـه الوقـت حاديـه |
|
وبادي بهم يقـول زينـات الامثـالْ ويذكر منازلهم مـن الشّيْـر لقيـالْ |
|
بالخوف ماهابوا مـن القـوم خيـالْ عند العشايـر رميهـم مـن يدانيـه |
|
وخفيج يوم يمـدحْ رفـاع الحمايـلْ طلقيـن الايـدي كاسبيـن النفايـلْ |
|
أولاد سـالـم عـدهـم بـالاوايـلْ قصيدتـه كـل ٍ دريبـه وترضيـه |
|
وصفـوق ابولـزام شاهـد ٍ لفعلنـا عد الصحيح وقـال نعـم ٍ بربعنـا |
|
مايجحد المعروف والطيـب والثنـا ألا ردي الجـدْ والـحـظ مهفـيـه |
|
ويوم ابن معَقِلْ يمنـا جـاك عـادي بـاولاد وايـل دايريـن الطـرادي |
|
غدوا بهم ربعـي صطـام المعـادي عقيدهـم مذبـوح والفـود مخطيـه |
|
وناقة غريِّـب يـوم تِدْخَـلْ علينـا وتسببـت بشـرورهـا وابتليـنـا |
|
قمنـا بواجـب حقـنـا مانثنيـنـا الثـار ماننسـاه والدّيـن نوفـيـه |
|
ربعي قطعوا للثـار ديـار ٍكثيـره من نجد ساروا ما خطاهم قصيـره |
|
وصطوا على ابن دهيِّم ٍ بالجزيـره ماهابـوا الجربـان لوهـم ملافيـه |
|
وتشهد لهم قارة الجِنَبْ والكِظاميـرْ والرّوضْ والمركوزْ والحَزِلْ والشِّيْرْ |
|
ولوقة مقيـض مدلهيـن الخواويـرْ ياسِعْد بالشِّداتْ مـن هـمْ حواليـه |
|
ونعم ٍ بضاري راعي الكود والجـودْ الفارس المشهور من نسـل محمـودْ |
|
النادرالضِّرْغـام مايقبـل الــزودْ ياعِدَّوا رجال العـرب مـن يدانيـه |
|
ويذكرْ لنا سالم قصيـر الدغيـراتْ في كون ظفرة يوم الأذهـان خَفَّـاةْ |
|
ركض على الصَّابورمابـه مـراواة وخذوا بناتـه مابقـى مـن تولِّيـه |
|
وإن كان تنشد عن شفاقة وعبطـانْ طيور شلوى من صواريم حـورانْ |
|
نعـم ٍ بهـم ياثـار عـجّ ٍ ودخـانْ يشهد لهـم بيـت ٍ لعـدوان بانيـه |
|
وعايس ابو حسبان يـاوَيْ عايـسْ مِفْرَاصْ مـاص ٍ للمهمـات عايـسْ |
|
بـه النِّـدى والجـود ماينتقـايـسْ شيخ الجهامـة والمصاليـح تتليـه |
|
ويامنَّهم حضروا رجـال الطلايـبْ يقلط لهم سالـم عطيـب الضرايـبْ |
|
حلاّل عسـرات القفـول الصعايـبْ ياكبرت القالات مـا حـد ٍ يناحيـه |
|
عايس وسالـم كاسبيـن الحميـدي عصمان الارياء عامسين الضديـدي |
|
يشهد لهم بالطيـب حـزل الفديـدي نقي عرض ٍ طيبهـم ماهـو كاميـه |
|
وسعدي على الشَّقراء نهار الكتامـهْ ياصـار بالميـدان يرخـي زمامـهْ |
|
يـاوَيْ خيّـال ٍ يـفـك الجهـامـه شحيتان مـن فعلـه دنايـاه تبكيـه |
|
ونعم ٍ بصايـل ْ زبـون المجاهيـمْ صفر ٍ لهن بالكون جضّ ٍ وترزيـمْ |
|
ينخن شجـاع ٍ ضـاري ٍ للملازيـمْ عـيّ ٍعديـم ٍ تايـه ٍ مـن يلاقيـه |
|
وانبيك عن حسبـان زيـن الفعايـلْ مركي على كبد الحريـب الملايـلْ |
|
شيخ ٍ كريـم ٍ وافـي ٍ بالخصايـلْ بعيد صيت ٍ حتى الاجنـاب تطريـه |
|
وابو نفود الليـث سبـع الضّـواري عوق العديـم اللـي بفعلـه يمـاري |
|
ملحق خويّـه مايهـاب الخطـاري فـي ساعـة ٍ دمّ المناعيـر كاسيـه |
|
وعيسى اخو دهَيَا سلايـل كحيـلانْ شيخ ٍعلى الطّولات والطّيب شفقـانْ |
|
يوم الفعايـلْ والجمايـلْ والاكـوانْ عند الخوي خمس ٍ ذبحهـم حواليـه |
|
وباني ليامنَّه ضوى البيت واحتـافْ سبع ٍ ضرير ٍ ماتراعـد ولاخـاف ْ |
|
كساب وضح ٍ جابهن من وراء رافْ عشرين مع عشرين حروة مغازيـه |
|
وامّا الدّليـل اللـي عليـه الكلامـي دليـل عيـرات ٍ تبـوج الظّلامـي |
|
هريش ستـر مردّعـات الوشامـي قِـدَا عبـدالله يـوم حايـل تجليـه |
|
ونعـم ٍ بمقبـلْ كريـم السبـالـي يذكر مع الاجـواد مـاض الفعالـي |
|
يوم الكـرم والجـود لهـن مجالـي ذبح قعود البيـت مـن دون عانيـه |
|
وذكرت اخو نوى نهـار الطـرادي مهيقيص خيـال الطّيـاح التّـلادي |
|
قلايعـه بالكـون تسعـة جـيـادي وسمي غدير الخيـل بفعلـه نسمّيـه |
|
دايم على سعـدى بـراس الجذيبـهْ تهابـه الغـزوان ماينعـدي بــهْ |
|
شـر ٍ شريـر ٍ مايقـربْ شعيـبـهْ ياويل من هـو يزحمـهْ أو يعاديـه |
|
وونيس أبو جرمان حِبْـس الكمينـي راع الصّخى والجود طلق اليمينـي |
|
فـي بيتـه الديـوان دايـم يبينـي من روس ربعه عايـزات ٍ مماشيـه |
|
واذكرْ خليفـة بالشّـرف والبتاعـهْ صليب راي ٍ من رجـال الشجاعـه |
|
امناكـد العـدوان ماهـو رعاعـهْ يستاهـل الامـداح جامـعْ بنيخيـه |
|
ونعم ٍ بطاري يوم جـدعْ الملابيـسْ ودعيثير ومنذرْ كاسبيـن النواميـسْ |
|
وقطيّان حمـاي البكـار العراميـسْ نعم ٍ باهل البلهـاء رجـال ٍ مداليـه |
|
وعايد العقيّـد يـوم كُـوره يشـدّهْ وركبوا معـه عيـالْ عمـه وجـدّهْ |
|
طلعـه بعيـد ٍ مـا قريـب ٍ مهـدّهْ ذود الدعيْدع حايشـه مـن مفاليـه |
|
وساير ابن هادي زبـون الونيّـاتْ يثني قفا الشردان والخيـل عجـلاتْ |
|
هو الذي لمثلـه تشـوم الخَونـداتْ فراج بـن كليـب يذكـر مواريـه |
|
ونعم ٍ باخو فهيـدة غـلام ٍ عنيـدي اللي بـه الشّاعـر يعـد القصيـدي |
|
ويقـول غيـره مالقينـا عضيـدي في لقوة الهلباء هنـي عيـن ناخيـه |
|
ونومـان ورحَمَـة ْ ياويّـا دوالـي وخِتْخُوت وهديسان فِـرْز العيالـي |
|
عاداتهـم يثنـون خلـف التـوالـي ويفرح بهم راعـي هليـب مخليـه |
|
وعايد ومفـرج والحميـدي ونـزالْ نعم ٍ بهم ياصـار عـج ٍ وزلـزالْ |
|
والجيش يصلى بالمـوازر ويجتـالْ من ازرق الدخان والملـح شاويـه |
|
والنّعـم بجعيثـن كعـام العـداتـي بالكون يذكر من حضـاة الرماتـي |
|
صدق ٍ صحيـح ٍ مابقولـي رواتـي يشهد له عضيب السّعو ماهو ناسيـه |
|
واخوان مزنة واهني مـن رجاهـمْ هبيكـان وشايـع بعيـد معـداهـمْ |
|
ماذْكِـرْ بالماضيـن مثـل مغزاهـمْ وجابوا حلال القوم تسمـع حواديـه |
|
ودهام هـو دهـام راع الرشومـي عند الضياغـم قالـط ٍ ومحشومـي |
|
نعم باخـو مزنـة قـوي العزومـي رجل ٍ شريـف ٍ ماتـردتْ هقاويـه |
|
ويذكر لنا شـلاش يـوم الزّحامـي علـى القنِيْنَـة لاسقاهـا الغمامـي |
|
قـدام ربعـه راسـي ٍ مايضامـي نعم ٍ باخو حسناء ليا حـل طاريـه |
|
وحسن ابو صالح ربيـع الضّعافـي يـوم السنيـن الكايـدات العجافـي |
|
راع الصخـا يـاوي والله سنافـي كم من ضعيف بربعة البيت غاذيـه |
|
وعودة وغربي من خيار الاجاويـدْ ريف الخوي والضّيف والجار له عيد |
|
ورزق العَفَرْ كسّاب جزل التحاميـد اللـي مضيفـه للخطاطيـر بانيـه |
|
هذتا موجـز مـن فعـول ٍ حميـدهْ يصعـب علينـا عدّهـا وتعـديـدهْ |
|
تاريـخ يبقـى للقـرون البعـيـدهْ ماقـل دل وزايـدْ الهـرج مابـيـه |
|
ذكـرت طيـب ربوعنـا بالمثايـلْ وتبقـى المثايـل للفعايـل دلايــلْ |
|
مانا مـن اللـي يجحـدون الفعايـلْ طيب الجماعة كلهـم نفتخـر فيـه |
|
اذكرفعايلهـمْ ولابـه علـي عيـبْ واخصهـم بالمـدح والخيروالطيـبْ |
|
ولاانا بحـال مدوريـن العذاريـبْ ولاخيرفي رجـل ٍ تنكّـر لماضيـه |
|
ويالله أنـا طالبـك تغفـر ذنوبهـمْ وتنزل عليهم رحمة ٍ فـي قبورهـمْ |
|
وبجنة الفـردوس تجمـع شمولهـمْ أنت الكريم اللـي جـزال ٍ حسانيـه |
|
واليوم نحَمْد الله على حكم آل سعود أمن ورخى والناس بسهـود ومهـود |
|
وعسى الزمان اللي ذكرناه مايعـود خـوف ٍ وجـوع ٍ ماتعـدد بلاويـه |
|
وصلاة ربي عـد ماهـب نسنـاسْ على النبي الهاشمي صفـوة النـاسْ |
|
شفيعنا بيوم ٍ إيشيـب بـه الـراسْ مايلتفـت بـه غالـي ٍ يـم غاليـه |
الشاعر/ عيـد العيسى الضوي